معرکہ حق کی کامیابی کا ایک سال مکمل
سوہنا پاکستان یونین آف جرنلسٹ کا افواج پاکستان سے بھرپور اظہارِ یکجہتی
پاک فوج کے غازیوں اور شہداء کو سلام؛ وطن کی نظریاتی و جغرافیائی سرحدوں کی حفاظت کے لیے صحافی برادری فوج کے شانہ بشانہ کھڑی ہے: مرکزی قیادت کا مشترکہ اعلامیہ
لاہور (بیورو رپورٹ)معرکہ حق کی کامیابی کا ایک سال مکمل ہونے کے تاریخی موقع پر سوہنا پاکستان یونین آف جرنلسٹ (رجسٹرڈ) کی مرکزی قیادت نے پاک فوج کی عظیم قربانیوں اور دفاعِ وطن کے لیے ان کی بے مثال شجاعت کو خراجِ تحسین پیش کیا ہے۔ اس سلسلے میں مرکزی سرپرست اعلیٰ فیصل مجیب شامی، مرکزی صدر مہر جنید رشید، مرکزی سینئر نائب صدر حکیم محمد افضال کمبوہ اور مرکزی نائب صدر نوید انجم مغل کی جانب سے ایک خصوصی مشترکہ بیان جاری کیا گیا ہے جس میں افواجِ پاکستان کے ساتھ مکمل یکجہتی کا اظہار کرتے ہوئے اس عزم کا اعادہ کیا گیا ہے کہ ملکی بقاء اور سلامتی کی خاطر پوری قوم اور صحافی برادری ایک سیسہ پلائی ہوئی دیوار کی مانند متحد ہے۔
مرکزی سرپرست اعلیٰ فیصل مجیب شامی اور مرکزی صدر مہر جنید رشید نے اپنے خیالات کا اظہار کرتے ہوئے کہا کہ معرکہ حق میں حاصل ہونے والی کامیابی محض ایک عسکری فتح نہیں بلکہ یہ اس غیر متزلزل جذبے اور پیشہ ورانہ مہارت کی علامت ہے جو ہماری افواج اپنے وطن کی مٹی سے رکھتی ہیں۔ انہوں نے کہا کہ آج کا دن ان بہادر سپوتوں کے نام ہے جنہوں نے اپنی جانوں کے نذرانے دے کر ملک کی سالمیت پر کوئی آنچ نہیں آنے دی اور ثابت کیا کہ پاکستان کا دفاع ناقابلِ تسخیر ہے۔
مرکزی سینئر نائب صدر حکیم محمد افضال کمبوہ اور مرکزی نائب صدر نوید انجم مغل نے اس موقع پر گفتگو کرتے ہوئے کہا کہ افواجِ پاکستان ہمارا فخر ہیں اور معرکہ حق کی تاریخی کامیابی نے ایک بار پھر دشمن کے ناپاک عزائم کو خاک میں ملا دیا ہے۔ انہوں نے مزید کہا کہ سوہنا پاکستان یونین آف جرنلسٹ سے وابستہ تمام صحافی درحقیقت قلم کے سپاہی ہیں جو وطن دشمن عناصر کے منفی پروپیگنڈے کو بے نقاب کرنے کے لیے اپنی افواج کے ساتھ ہراول دستے کا کردار ادا کر رہے ہیں اور ملک و قوم کے وقار کی خاطر کسی بھی قربانی سے دریغ نہیں کریں گے۔
مشترکہ بیان میں معرکہ حق کے شہداء کے درجات کی بلندی کے لیے خصوصی دعا کی گئی اور ان کے اہل خانہ کو یقین دلایا گیا کہ پوری قوم ان کی عظیم قربانیوں کی ہمیشہ احسان مند رہے گی۔ مرکزی قیادت نے اس بات پر زور دیا کہ موجودہ حالات میں میڈیا کا کردار انتہائی اہم ہے اور صحافتی برادری آزادی و امن کی فضا کو برقرار رکھنے کے لیے اپنا تعمیری کام جاری رکھے گی۔ معرکہ حق کی یہ کامیابی درحقیقت حق، سچ اور قومی وقار کی فتح کا استعارہ ہے۔
